sonito 72

(para ed saray bibiin Pangasinansi)



dyusa da’ra’y boleg-kayomanggi

a linmesa ed buraka’y Ari

labus-lakseb mo ya kinaliktan

so dilim a ganggana ed salming

a dinungaoan da’ra’y limgas-dayat

legan ya ipipintak so lupam

ed saray ompapalir a lurem



kioas mo’y masimpit ya marikit

a pipara ed si Maria Clara

say kabaliktan to balet sibeg

na amasonan amputi’y layag



natan nabuas tan dia ed arapen

sika’y aron manngara’y Pinabli

simbolo’y biin Pangasinansi