DANGOAN ED PRINSIPE’Y CABOLOAN

Paimano: arumog ko 'yan anlong ed archive na emails ko tan wala'y daket a Mayo 23, 2006. Say masimoon kon pisasalamat ed sika agin Mel ;-p

(para ed si Santiago Villafania)

A! Prinsipen Anak-Caboloan
Saray dayeo mo so idangoan mi
Ta sika may piog-ogagepan
Ya mangitalindeg na galang mi.

Sulming ka’d sengeg na Caboloan
Andawes ka’d saray arawdaoi
Anak iran nabligan na lamang
Pian paoilen da’y dilan pinabli.

Ag mo kari pandeene’y plumam
Parlang mo’y seseg ed pageo mo
Ya angga’d ag ibango’y Salitan
Anambayo’d dilin bilay tayo.

A! ilalak na banua’d letakan
Ibuang mo pa’y danas na pansesga
Gawim pa ‘ra’y ami’y kaagian
Ya oniliw’d gendat a Salita.

Igulom pa’y geleo-Pangasinan
Ya onsungpa’d dilan sangkaili
Pangkirlap mo pa’y ayuran plumam
Laknaban to’y Layug a pinili.

Sagyat mo kari ‘ra’y kabanyakan
Diad matmoy, makaroyon tanila
Sayakop mo’y puso’y katayakdang
Diad matbao, mablin pananalita.

Isibbuag mo pa ‘ra’y sangkasurian
Ya an-anlong mon essiab na pusom
Ipasek, ikayat mo pa ‘ra yan
Laineng na musian lapua’y arom.

A! Prinsipe, idantal mo’y kurang
Ibasbas mo’y dalan ed Parnasu
Ta manomtombok kamin kaagian
Araoi pan onsoko’y pageo mo.

Ta ag la pigan diad kasulitan
Na kairapan to nian pilaban
Ta diad elet na sisia’d Kataoan
Ya Amalsa’y Pangasinan
Et saray Anak-Caboloan
No pablien tan kaoananen da ‘may
Salitan gendat lan kasipuran
Aliling to’y dalin—amagaan
Balet no naynay ya naoranan
Onlemek tan namaymay lan lamang
Pian sikato lanti pamaseka’y
Bini’y Salitan andi miegpang
Diad sibeg, aro tan pankaoanan
Ontobo, onsalindak, onsibbual.

-- Melchor Orpilla