2 Pangasinan Poems: Gurgurlis ed Banua / Ghazal 57 in "A Kabaleyan's Thoughts" (Sunday Punch)
Landscape with Figures (1942) nen Carlos Bulosan,
impatalus ed salitan Pangasinan nen Santiago B. Villafania
PASEMPET lamet tatandaga’y bitewen ed biek-taew,
say awaran et niduman siplog na dagem ed kanonotan
ya sinmabin yalalig ira’y babuak-pataboy na taon iran aman:
sempetan ya pakalmoan na pasen ya abalang ed saray
signos na sansinakuban. Saray pugaro naandi la.
Saray nankarayan alingwanan... Sasalien ya nonoten so kanaway
tan sarama’y atiguay ed nababalang ya dalin
(pokepokel ed talba no iner inatey ira’y atateng tayon duka),
say panwawaywaya et asagmak ed ambelat ya alaal
na pabaing ed panaon diman.
Say banua et maruksa ed sinulmingan:
awaran: ngara’y totoo: palar na bilay:
amin ya arawin salinap a nginmeswa tan kinmiwas,
bebetagen to ‘ra’y kabkabat ya ngarangaran ya pinepe’y
maando ‘ran sangi pian say puso yakis to, “Say sempetan sananey ya ayaman,
kada kupbang paarap et kupbang paarap ed talon lasus ya taon
na impangekal ed katuaan…”
Aliwan dapit-sempetan
ed onan taniag a dalin, ono intaynan
ed amputin beyebey na dayat ya ombubuneknek ed baybay,
odino aron onlulukso ed saray ketegan na lakseb dia’d kamarerua,
bangta maawang ya tawir na bakal tan kaderal onteterak
ya bengatla para ed saray manbibilay tan labay da’y ompatey.
Say bilay et bayes ya salita. Kada too alingon imbalikas to’ya…
Inusar ed antikey a pilikula nen Christopher Gozum ya Surreal Random MMS Texts para ed Ina, Agui, tan kaamong ya makaiiliw ed sika : gurgurlis ed banua. Ginamoran na Ishmael Bernal Award para ed Young Cinema nen 2008 Cinemanila International Film Festival.
Pangasinan Ghazal 57
say amtak no awawas ak la’d sika
talampong ka ed sayan pililikna
agni naomas ed isip ko’y lupan
nipaet lan andi’y talang ed walna
ag nilikod so maabig mon waleng
amalayon ed siak ya aroen ka
anggano nilegias so palar tan dua
inmonung ak lapu’d pinabli taka
nipanon konon saksakey so oked
anta palawpaw iyan singa apa
agko naoynot ed nonot no anto
so masalamsam a yanlong ed sika
ghazal man iyan maralus ya ayat
manempey na panpilalek ko’d sika
Published in A Kabaleyan's Thoughts (Sunday Punch, 27 March 2011)
impatalus ed salitan Pangasinan nen Santiago B. Villafania
PASEMPET lamet tatandaga’y bitewen ed biek-taew,
say awaran et niduman siplog na dagem ed kanonotan
ya sinmabin yalalig ira’y babuak-pataboy na taon iran aman:
sempetan ya pakalmoan na pasen ya abalang ed saray
signos na sansinakuban. Saray pugaro naandi la.
Saray nankarayan alingwanan... Sasalien ya nonoten so kanaway
tan sarama’y atiguay ed nababalang ya dalin
(pokepokel ed talba no iner inatey ira’y atateng tayon duka),
say panwawaywaya et asagmak ed ambelat ya alaal
na pabaing ed panaon diman.
Say banua et maruksa ed sinulmingan:
awaran: ngara’y totoo: palar na bilay:
amin ya arawin salinap a nginmeswa tan kinmiwas,
bebetagen to ‘ra’y kabkabat ya ngarangaran ya pinepe’y
maando ‘ran sangi pian say puso yakis to, “Say sempetan sananey ya ayaman,
kada kupbang paarap et kupbang paarap ed talon lasus ya taon
na impangekal ed katuaan…”
Aliwan dapit-sempetan
ed onan taniag a dalin, ono intaynan
ed amputin beyebey na dayat ya ombubuneknek ed baybay,
odino aron onlulukso ed saray ketegan na lakseb dia’d kamarerua,
bangta maawang ya tawir na bakal tan kaderal onteterak
ya bengatla para ed saray manbibilay tan labay da’y ompatey.
Say bilay et bayes ya salita. Kada too alingon imbalikas to’ya…
Inusar ed antikey a pilikula nen Christopher Gozum ya Surreal Random MMS Texts para ed Ina, Agui, tan kaamong ya makaiiliw ed sika : gurgurlis ed banua. Ginamoran na Ishmael Bernal Award para ed Young Cinema nen 2008 Cinemanila International Film Festival.
Pangasinan Ghazal 57
say amtak no awawas ak la’d sika
talampong ka ed sayan pililikna
agni naomas ed isip ko’y lupan
nipaet lan andi’y talang ed walna
ag nilikod so maabig mon waleng
amalayon ed siak ya aroen ka
anggano nilegias so palar tan dua
inmonung ak lapu’d pinabli taka
nipanon konon saksakey so oked
anta palawpaw iyan singa apa
agko naoynot ed nonot no anto
so masalamsam a yanlong ed sika
ghazal man iyan maralus ya ayat
manempey na panpilalek ko’d sika
Published in A Kabaleyan's Thoughts (Sunday Punch, 27 March 2011)
Comments