Pilalek

(para ed si E.M.)

1.

ompay ko’y ermen ed sayan bekta
say kanonotan wala ed sika

no lakseban man so kamarerua
say aysing ya nanengneng et sika

dia ed laem tonia’y inkapalsa
anggapo’y arum ya musia: sika

talintao ka man O danaya
say kasikasikaan et sika

limgas na dayat - limgas na uma
andi’y pinabli no ag ta sika

salamsam ko’y aron ag mangangga
laut no say katupag et sika

gala pinabli lakap mo ak pa
ompay ko’y ermen ed sayan bekta

2.

agew-labi’y agko pakaugip
bang komun naandi ka la’d isip

kasikasikaan mo’y tinmanep
tan ginmisla la’d laem na isip

say ngaran mo so mogmon laineng
no maingongot bilang so isip

bangta singa ak bagel pinabli
no say lupam la’y ompinta’d isip

musia kan pilalek kon nalakap
balet bengatlan naandi’d isip

et no ibeneg taka la’d lingwan
sutil kan onapireng ed isip

indengan labat ayat lan nagnap
agew-labi la’y ag pakaugip

3.

sanlegan ya wala ‘yan linawa
mangando’y panangaro ed sika

ag mansampot ed sayan ghazalia
panangaron inggetar ed sika

tooren so sipan kon insungpa
anlonge’y panangaro ed sika

ipintak so limgas mo’d salita
amin iraya para ed sika

sika so laineng tan tanila
gisla tonia’y anlong ko ed sika

angga’d amay la ‘yan bilay aya
anggapo’y arum no ag ta sika

kasikasikaan mo’y ingeswa
sanlegan ya wala ‘yan linawa