Diglat ed Earth Hour

Liket tan bilay na dapag a mundo so bilunget ya impangaro da’ra’y pinalsa ed dili ton dabuk.

Say palesan liwawa ya linmaknab la ed laman to et apuy ya manesebseb ed ambetel ya dangat dia’d sankalaeman tonia.

Samal iyan liwawa ya kalkalnan mamapatey ed baog tan ula-ulat na mundon gagalawan.

Samal iyan mamapaekat ed sobul iran manpapatelek ed mundo.

Say pangerep na sarayan palesan silew ed agew aya et mogmon bilay ya mangekal na punaw tan paet pian namawmawan so mundo.

Paulian ya say arin banua so mangaplos ed pagew to tan say binarin bulan so mangiter na ambetel a liwawa pian say kuyab to et narengel ed sansinakuban: tanul na alalig ya mamakidiam tan mamaimis ed saray bitewen tan agagi to ‘ran planita.